2008 азы августы цауты фæдыл Гуырдзыстоны гæнæнуæвæг ног фæдагуырд ауадзыны тыххæй
Фæстаг рæстæджы гуырдзиаг бæрзонд трибунæтæй арæхæй-арæхдæр хъуысынц 2008 азы августы хæсты рæстæджы бынат кæмæн уыдис, уыцы фактты фæдыл ног фæдагуырд ауадзыны тыххæй æмæ сын æмбæлон аргъ скæныны тыххæй. Уыйадыл, Гуырдзыстоны премьер-министр Бидзина Иванишвили фехъусын кодта, зæгъгæ, «хæсты темæ у мигъæмбæрзт» æмæ æрсидтис йæ уавæрты тыххæй йын ног фæдагуырд ауадзынмæ.
Æмбæрстгонд нæу, цас бирæ рæстæджы дæргъы уыдзысты мигъæмбæрзт, канд 2008 азы цаутæ нæ, фæлæ ма фæстаг дыууын азы дæргъы Гуырдзыстоны къухдариуæгады æппæт фашистон фыдракæндтæ дæр. Рагæй у афон, цæмæй сæ цæстытæ байгом чындæуой гуырдзиаг адæмæн нæ, фæлæ ма æппæт дунеон æмæхсæнадæн дæр Гуырдзыстоны къухдариуæгады бынгæнæг æнæадекватон политикæйы тыххæй дæр Хуссар Ирыстоны адæммæ ахасты, кæцыйы фæстиуæгæн фæмард сты бирæ адæм, пырх æрцыд бирæ объекттæ æмæ регионы сæвзæрд катастрофæйон ситуаци.
Зындгонд у Х. Тальявинийы дунеон къамисы бындурон хатдзæг уый тыххæй, æмæ 2008 азы Хуссар Ирыстоны ныхмæ хæст комкоммæдæр Гуырдзыстон кæй райдыдта, æмæ ууыл нæй дызæрыггæнæн. Уымæй дарддæр ма 2008 азы августы цаутæн ис бирæ удæгас æвдисæнтæ, кæцытæ зонынц рæстдзинад æмæ уый тыххæй хъуамæ радзурой. Сæрмагондæй та гуырдзиаг æфсады инæлар, 2008 азы августы хæсты хайадисæг, Цъителашвили Тристан фехъусын кодта, зæгъгæ, «махмæ ис документтæ æмæ пленкæтæ», кæцытæ æвдисынц Гуырдзыстон Хуссар Ирыстоны ныхмæ уæрæхмасштабон архайдтытæм йæхи куыд цæттæ кодта æмæ сæ уагъта, уыдæтты тыххæй. Кæд инæлар Цъителашвили Тристаны иуæй-иу ныхæстæ домынц уæлæмхас фæдагуырд ауадзын, уæддæр йæ хъусынгæнинæгтæ практикон æгъдауæй бæлвырд кæнынц августы тыххæй Хуссар Ирыстоны позици, уыцы нымæцы, 2008 азы Гуырдзыстоны спецслужбæтæ Хуссар Ирыстоны территорийыл цы бирæнымæц провокацитæ арæзтой, уыдон дæр.
Республикæ Хуссар Ирыстоны Фæсарæйнаг хъуыддæгты министрад ныры Гуырдзыстоны къухдариуæгады хъусынгæнинаг ногæй фæдагуырдауадзыны тыххæй хъуыдыйæн кæны æвæрццаг аргъ æмæ ныфсдзинад зæгъы, зæгъгæ, 2008 азы августы цауты фæдагуырд формалонæй нæ, фæлæ уагъд кæй æрцæудзæнис æппæтфарсонæй, объективонæй æмæ ма, уыимæ иумæ, Гуырдзыстоны хицауады ‘рдыгæй хуссарирыстойнаг адæмы ныхмæ фæстаг дыууын азы дæргъы цы фыдракæндтæ æрцыд, уыдоныл ныр уæддæр кæй басæтдзæн, æмæ аххосджынтæ та закъонмæ гæсгæ, цахæм сæм æмбæлы, ахæм æфхæрд кæй баййафдзысты.
Цхинвал, 2013 азы 16 апрель